Psalms 51

ፍጻሜ ፡ ዘበአእምሮ ፡ ዘዳዊት ።
ዘአመ ፡ መጽአ ፡ ዶይቅ ፡ ኤዶማዊ ፡ ወነገሮ ፡ ለሳኦል ፤
ወይቤሎ ፡ መጽአ ፡ ዳዊት ፡ ቤቶ ፡ ለአቤሜሌክ ።
1ለምንት ፡ ይዜሀር ፡ ኀያል ፡ በእከዩ ፤
ወይዔምፅ ፡ ኵሎ ፡ አሚረ ።
2ኀጢአተ ፡ ሐለየ ፡ ልብከ ፤
ከመ ፡ መላፄ ፡ በሊኅ ፡ ገበርከ ፡ ሕብለ ።
3አብደርከ ፡ እኪተ ፡ እምሠናይት ፤
ወትዔምፅ ፡ እምትንብብ ፡ ጽድቀ ።
4ወአፍቀርከ ፡ ኵሎ ፡ ነገረ ፡ ልሳን ፡ መስጥም ።
5በእንተዝ ፡ ይነሥተከ ፡ እግዚአብሔር ፡ ለዝሉፉ ፤
ይመልሐከ ፡ ወያፈልሰከ ፡ እምቤትከ ፡
ወሥርወከኒ ፡ እምድረ ፡ ሕያዋን ።
6ይርአዩ ፡ ጻድቃን ፡ ወይፍርሁ ፡
ወይስሐቁ ፡ ላዕሌሁ ፡ ወይበሉ ።
ነዋ ፡ ብእሲ ፡ ዘኢረሰዮ ፡ ለእግዚአብሔር ፡ ረዳኢሁ ፤
7ወተአመነ ፡ በብዝኀ ፡ ብዑሉ ፤
ወተኀየለ ፡ በከንቱ ።
8ወአንሰ ፡ ከመ ፡ ዕፀ ፡ ዘይት ፡ ስሙር ፡ ውስተ ፡ ቤተ ፡ እግዚአብሔር ፤
ወተወከልኩ ፡ በምሕረቱ ፡ ለእግዚአብሔር ፡
ለዓለም ፡ ወለዓለመ ፡ ዓለም ።
9እገኒ ፡ ለከ ፡ ለዓለም ፡ እስመ ፡ ገበርከ ፡ ሊተ ፤
ወእሴፈዋ ፡ ለምሕረትከ ፡ እስመ ፡ ሠናያቲከ ፡ ኀበ ፡ ጻድቃኒከ ።